|
華語版 台語版
本文目的主要在建立台語版的國家重要文獻語料，證明台語文的功能不只作為家庭語言而已，不管在法律攻防辯論場合、國家公務宣示部門都足堪大任，台語文做為台灣通行語的地位更加確認。
本文乃是根據南方快報所提供的華語版，透過「華台轉換系統」做初步對譯，然後對照臨場的台語文記錄，逐步人工校對為台語版。
南方快報提供的華語版雖儘量忠實，經過比對顯示，它還是以意譯為主，倘逕依該華文直接對譯台文，恐與原音有所出入。倘能取得原版發音的光碟，應該可修訂到更符合實際的口語版。
陳總統的發言並非全部台語，其間夾雜華語的部分，我視情況譯為台語，或是繼續保留華語詞。
親愛的國人同胞，阿扁上敬疼的鄉親父老、兄姐、少年朋友，非常感謝大家佇百忙當中會當撥工聽阿扁仔「向人民報告」。
大家應該猶會記得，2年外前，就是2004年3月27日暗時仝款這個時陣、這個所在，阿扁仔參加了一場國際記者會，當時佇總統府頭前凱達格蘭大道，有真濟人舉行抗爭，因為當年2004年3月20日總統大選後e5一禮拜左右，有一寡候選人無法度接受台灣人民投票的結果，講阿扁仔佇hit擺的選舉作票，欲叫阿扁仔落台，相連續一禮拜霸佔凱達格蘭大道舉行抗爭。
彼當時阿扁仔透過國際記者會講出阿扁仔的心情、想法及期待，想袂到經過2年3個月，仝款的所在，阿扁仔必須向人民報告，不過情景對凱達格蘭大道soa2到立法院。
 阿扁仔接著立法院互咱的咨文，叫咱佇 6月20日今仔日進前，針對罷免案提出答辯書，當然對著立法委員，特別是最高民意機構－立法院，依照憲政秩序及憲法增修條文有關規定所提出的罷免案，咱必須ka7伊尊重，但是真清楚的，佇咨文中特別說明，如果無欲針對罷免案提答辯書，全院委員會猶是會使直接審查。
所以今仔日阿扁仔已經透過正式的方式ka7立法院王院長說明，本人決定無欲提答辯書，欲向人民作報告，這完全是依照憲法kap增修條文、特別是立法院的規定來進行，絕對無藐視國會的意思，而且嘛是依照憲政秩序來遵循。
當然本人欲先說明的是，今仔日m7是記者會，是ka7人民報告，就算是記者會，大家攏嘛知影，就親像2004年3月27日的國際記者會，咱嘛無互記者朋友發問，真che7總統所參加的記者會嘛m7是逐擺攏互記者發問。因為今仔日是ka7人民報告，咱無希望失焦。我嘛欲ka7記者朋友特別聲明，咱未來會使安排記者會，嘛會當用透過茶敘的方式ka7各位記者朋友作報告，互各位記者朋友會當提問，這點猶請各位記者朋友會當包涵。
立法院有人提案欲罷免總統，為啥物欲罷免總統？罷免理由是啥物？本人相信到目前為止，我敢講90 %、甚至有95 % 的台灣人民，恐驚猶m7知為啥物立法委員、有一寡黨團欲罷免總統，罷免總統的理由是啥物？大家敢知影？就算知影，敢講非常清楚罷免的具體內容及理由？
阿扁仔相信親像這款立法院的咨文，內容所寫欲罷免總統的理由，阿扁仔認為有必要ka7大家作報告，這個理由敢著？事實敢是按呢？這個理由敢無問題？是m7是有真濟值得檢討的所在？本人認為有必要ka7人民作報告，hou7大家知影，hou7大家了解，hou7大家嘛會當來思考。
阿扁仔嘛欲來拜託咱親愛的國人同胞，阿扁仔上敬疼的鄉親父老、兄姐、少年朋友，大家共同來公判，大家來講道理，阿扁仔無欲更改罷免總統理由的前後順序。
有關罷免第一點理由：「違憲亂政」
其中第一條欲罷免總統的理由，講阿扁仔「違憲亂政」，講本人違反憲法「多數治理原則」而少數執政，講我「權力下放」形同公開承認過去超越憲法權限，敢是按呢？大家攏知影，阿扁擔任總統6年，本人任命行政院長組閣嘛m7是第1 擺，2000年阿扁仔擔任總統e5時，得票率為39.3％，連四成都無，佇國會咱泛綠所會當掌握的席次無夠三分之一，彼當時，有誰講阿扁就愛用立法院的多數黨來組閣？彼當時，阿扁仔直接任命國民黨唐飛先生來擔任行政院長，國民黨嘛講伊無欲背書，嘛無欲支持，彼當時有誰講本人是少數執政，抑是違憲亂政？
續落來，阿扁仔任命民進黨籍的行政院長組閣，包括舊年謝長廷前院長，會記得伊去立法院作施政報告後， 無分朝野，無分黨派，全體立法委員攏ka7 in呵咾，這是從來m7-bat過的現象。當然改革是當時的氣氛，扁宋會朝野和解、共生嘛是真重要的原因。敢有誰講這是違背憲法多數治理原則，是違法亂政？
所以呢！大家愛知影，大家攏講be7使違憲，欲行憲。總統直接民選，總統任命行政院長無需要經過立法院同意，總統是國家安全會議主席，這些攏是阿扁擔任總統前已經存在的制度及憲法修正過的條文，m7是阿扁仔所制定。無任何一條憲法條文規定總統著愛任命立法院的多數黨組閣，做行政院長。這是憲法目前的事實，大家如果認為按呢無好，會使修改憲法，會使明文規定恢復行政院長的任命必須經過立法院同意，看是欲來規定be7使少數執政，若按呢嘛無要緊，無koh規定khah清楚咧，抑是規定著愛經過立法院多數黨抑是多數聯名所推薦的人做行政院長。若大家認為按呢是對的，是好的，阿扁仔做總統自然照辦。但是佇憲法未修改以前，我按呢做，有啥物m7著？
有關「權力下放」
有關「權力下放」，本人講kah非常清楚，屬佇總統的，攏總無改變，咱不過是將黨政的運作「權力下放」，完全無違背憲法的規定，汰會使講我違憲亂政？
大家嘛知影，國民黨執政時，以黨領政，任何重要人事及政策攏愛經過國民黨中常會通過後，才送到行政院院會討論，這是國民黨執政時的模式。
 但是呢，到民進黨執政，咱袂使以黨領政，因為黨袂使比政猶khah大，黨不過是一個政治團體，按呢爾爾。所以過去咱有九人小組，續落來總統兼主席以推行黨政同步，上濟是黨政相輔相成，因此過去的習慣、經驗及運作，人事也好，政策也好，中間有真che7無仝的意見，就透過總統府派人或者是請總統親自出面來協調，這就是黨政同步的運作模式。
咱感覺按呢嘛有一寡仔問題，因此希望大家che7少會當分擔一寡責任，5月31日阿扁仔講，除了總統職權無法度讓渡、無法度放棄外，其餘黨政權力徹底下放。也就是講，總統從此無koh出面，總統府嘛無派員參與相關的協調，這嘛是好事一件，希望大家會當共同分擔責任。M7-koh，用這些理由欲來罷免阿扁仔，講阿扁仔違法亂紀，按呢敢有理？按呢敢著？我欲拜託鄉親父老兄弟姐妹來主持一個公道。
「五院」變成「四院」
其實，講著違憲亂政，咱知影咱是五權憲法的國家，咱有五院，包括有監察院。m7-koh我佇一年外前提名了監察院長、副院長及監察委員的人選，依照憲法，立法院應該採行同意權。當然，並毋m7是我所提的人，立法院攏著愛照單全收、攏著愛通過。你嘛會使無仝意、嘛會使剔除、嘛會使thai5掉，但是經過將近年半，無欲行使人事同意權，互咱的「五院」變做「四院」，致使咱無監察院，致使咱的人權無保障，真濟陳情案無法度辦理、無法度查案、無法度糾彈不法，你講是啥人 teh違憲亂政？這個道理非常清楚！
講著違憲亂政，這幾年來阿扁看著真che7資料，大家攏知影司法愛獨立，但是過去有人曾講：「法院是國民黨開的」，事實敢是按呢？就以一個已經公開的檔案文件來講，民國49年9月8日下晡5點，「自由中國」雷震案tih-beh宣判，當時是以軍法審判，佇宣判前的6點鐘，也就是當天上午11點，蔣介石總統佇總統府內主持了一個黨、政、軍的內部協調會議，議題是針對下晡的案件應該著按怎判。蔣介石總統親自裁示，白紙烏字寫講，刑期be7使低於 10年，「自由中國」一定ai3關門，初審了後，上訴嘛無用，無法度推翻初審決議。三點裁示白紙烏字寫落來，chit-ma2檔案文件已經公開，司法原本應該獨立，當時的總統卻做按呢裁示，大家一定著照辦，後來嘛是按呢辦理。誰敢挑戰、誰敢講這是違法亂政？
大家攏知影，總統身為國家領導人，嘛是三軍統帥，只有總統三軍統帥才會當親自主持軍事會談。但是，大家是m7是知影佇民國61年到67年間，是啥物人 teh主持軍事會談？61年到64年總統是蔣介石先生，續落來3年則是嚴家淦先生擔任總統，m7-koh佇這6年當中，軍事會談卻是由當時的行政院院長蔣經國先生主持。我欲請問大家，行政院院長能力koh再強，伊m7是總統，毋是三軍統帥，憑啥物主持軍事會談？伊就按呢主持6年軍事會談，你講，甚麼叫做違憲亂政？啥物人敢挑戰伊？啥物人敢講伊毋著？敢講的人就會hong5抓起來！但是chit-ma2 的情況敢會當 hou7你違憲亂政？咱必須ai3嚴守分際，希望大家就此做一個參考。
有關罷免第二點理由：經濟不振
講欲罷免阿扁仔的第二點理由是經濟不振，講阿扁仔拼政治，無顧經濟、罔顧民生，hou7台灣經濟衰退，經濟表現在四小龍之末，國家競爭力嘛ti7全球排名下跌。阿扁仔欲 ti7 chia向大家報告，咱欲來拼經濟，所以ti7這擺立法院臨時會中，咱提出真濟治水法案kap預算，m7-koh臨時會到現在召開chiah-nih8久矣，講欲 ka7治水法案排做第一案，講欲來通過，欲來討論，有無？真濟重要的預算案攏無討論、通過，只有政治考量，欲來罷免阿扁。是誰拼政治無顧經濟，罔顧民生？
咱續落七月欲來召開「經續會」，m7-koh有的政黨已經表明無欲參加，既然講欲「拼經濟」，是按怎行政院欲來召開「經續會」又koh m7支持？m7參與？chiah-e5 攏是相當嚴肅的課題，值得大家詳細思考。
我ti7 chia提出三個統計數據請大家參考，當然，我對台灣的經濟表現嘛無滿意，嘛希望台灣的經濟會當 koh-khah好。但是台灣的經濟，敢講親像人講的hiah-nih8 bai2？
第一點，今年5月咱的進出口，無論是進口抑是出口攏佇180億美元以上，從來m7-bat hiah高過，咱頂個月創造了歷史上的高峰。
第二點是台灣的外匯存底，佇2000年阿扁上任時，台灣的外匯存底是1000億美元，今年5月咱的外匯存底已經超過2600億美元，其中1千3百億美元是來自外資，如果台灣的經濟情況無好、投資環境無好，外資外商欲按怎會對台灣有信心咧？目前，咱的外匯存底企世界第3，kan-ta輸中國kap日本。
第三點是咱的平均國民年所得，舊年咱頭一擺超過1萬5千美元，今年咱有機會突破16,423美元，這攏是歷史性的新高。
根據IMD洛桑國際管理學院所做的報告，咱的全球國際競爭力，佇2000年是第20名，舊年咱進步到第11名，上新的數據咱退步做第18名，這是一個警訊，咱必須檢討問題到底出佇叨位？有人講，這kap政爭有關，無m7著，不過政爭絕對m7是唯一的因素，一定猶有其他原因。
並m7是所有的的國際競爭力評比攏是ka7咱洩氣的，嘛有真濟的鼓舞、真che7的肯定kap期許。大家知影「世界經濟論壇」（WEF)有關「成長競爭力」的評比，佇2000年阿扁上任時咱是第10名，續落來逐年攏有進步，分別是第7名、第6名、第5名、第4名、舊年退步1名成做第5名，m7-koh咱是亞洲內底連續4冬的第1名。
「世界經濟論壇」（WEF)有關「資訊科技競爭力」，真歡喜，咱第1擺進入前10名，舊年咱是第15名，今年咱進步8名變做第7名，香港退步4名變做第11名，韓國是第14名，日本退步8名變做第16名，中國退步9名變做第50名。
英國經濟學人資訊中心（EIU)，針對全球經濟體的經商環境進行評比，佇 2006到2010年，咱進步了3名，變做全球第19名。韓國為第26名，日本是28名，中國則是第50名。
阿扁仔提出chiah-e5數據，並m7是欲自我安慰抑是推卸責任，咱猶原嘛是be7滿意，因為只要咱koh-khah團結， khah少紛爭，台灣的經濟絕對m7是按呢爾爾。
有人講，台灣的自殺問題kap卡奴的問題真嚴重，有關卡奴的問題，大家知影咱已經teh改善中。其實，咱koh-khah嚴重嘛無韓國嚴重。
咱的自殺人口一年將近4千人，chit-e5數目是阮國十大死亡原因的第9位；佇中國，自殺則是in十大死亡原因的第5位，咱的人口是2，300萬，中國人口有13億，以每年自殺人口4千人為基準推算，中國人口為咱的 60倍，因此in 的自殺人數差不多是24萬人，m7-koh根據阿扁所看著的報告，中國1年自殺的人數是29萬。簡單講，in 的問題比台灣koh-khah 濟、koh-khah嚴重。大家攏知影，生命是寶貴的，任何人攏無自殺的權利，對tioh8任何一個人的不幸，咱攏非常艱苦。但是，be7使「無限上綱」，講因為自殺的人數濟，所以阿扁仔必須下台。
大家攏知影，失業率咱已經有誠大的一個改善，2004年連戰主席競選總統時，曾講只要伊當選，欲將失業率降到4%，其實，最近的六個月，咱的失業率攏保持ti7 4％以下，4月是3.78％，雖然毋是上好，m7-koh有teh改善、有teh下降，咱希望講今年全國的失業率會當降到4%以下，這m7是無可能，m7-koh 欲用這做理由，以經濟無好，愛我下台、欲罷免我，按呢著m7著？我嘛欲拜託咱的父老鄉親姐妹來評理、來公評。
有關罷免第三點理由：貪污腐敗、背棄清廉執政的承諾
第三點罷免理由講，阿扁貪污腐敗、背棄清廉執政的承諾，第一家庭成做貪污的死角，包括SOGO案、台開案、四大金控合併、OTC kap台灣高鐵案等，甚至第一夫人嘛 hong5講兩年前對收取非法獻金的指控，公開講白賊，囝婿涉入股市內線交易、收取政治獻金、替人事關說。
佇chia,阿扁欲向大家做報告，無錯，清廉執政是上起碼的自我要求、這嘛是全民的期待，做了無好，做了無夠，我攏愛反省，執政團隊嘛tioh8檢討，m7-koh你ka7所有的代誌， 攏總ka7伊當做弊案，每案必弊、無案不弊、無限上綱，按呢敢是事實？
佇chia，我欲 ka7大家講，像SOGO經營權之爭，我曾講過，我本人、我的太太也好，絕對無介入經營權之爭，我也曾以新聞稿表示如果我的太太有收受包括李恆隆、陳哲男、章民強、抑是徐旭東所贈送的禮券，我願意下台一鞠躬，我的保證、我的承諾到今[taN]、到未來，攏總絕對有效。m7-koh我嘛無希望看著有人「每日一爆」，甚至「一日數爆」，愈講愈花，我感覺按呢是足無道德，嘛是足無好的代誌。當然，阮太太bat去過SOGO買物，嘛bat用過SOGO禮券，m7-koh絕對be7使講這就是in四個所送的禮券，ka7兩個劃上等號，我感覺按呢m7是無事實，現在檢調單位tng teh調查，咱tioh8-ai3尊重司法，咱嘛be7使干涉，有抑無，相信最後檢調會ka7國人同胞交待，m7-koh無就是無，無直接theh8過in四個人的SOGO禮券，嘛無干涉經營權之爭。
咱所關心的是一個百貨公司尤其是SOGO，hiah-nih8有名，竟然發生問題，做為政府的咱kan-ta關心銀行債權問題，私人百貨公司欲賣m7賣？欲賣hou7 誰？是in的代誌，kap咱無關。m7-koh有人gia5總統府高層的名號，我感覺這是真無好的代誌，我聽當著 chih-e5風聲，我嘛主動叫馬副秘書長去做一個澄清，總統也好、總統夫人也好，咱絕對無介入、也be7管，若以「總統」、「總統夫人」或者是「總統府高層」的名義來招搖撞騙、唬人，我感覺攏是無應該的、嘛是無道德的事。Chit-ma2檢調單位tu2 teh調查，希望司法單位會當調查清楚。
其次，有關「台開案」，阿扁這擺 9工8暝拚外交，轉來到國內看著報紙才知影有「台開案」，所以，我也好，我的太太也好，攏kap「台開案」一點仔關係嘛無，chit-e5代誌佇猶未佇媒體發報進前，咱m7知啥物是「台開案」，今仔日不管是囝婿抑是親家涉入「內線交易」抑是其他案件，一定ai3接受調查，hou7人收押，咱嘛無話thang講，該起訴就起訴、該判刑就判刑，「法律chin前，人人平等」，絕無例外，無護短，嘛絕對無包庇。
Koh來講tioh8「金控合併」的代誌，che是政府的執政目標，咱欲佇2年內，hou7銀行的逾放比降到5％以下，而資本適足率提升到8%以上，咱做到矣。第一階段的金改成功，hou7咱對第二階段的金改koh-khah有期待，所以，舊年二次金改第一階段，咱會當ka7官股銀行12間減半做6家，嘛有3家銀行市佔率達10％，咱感覺誠安慰。所以，今年希望看金控敢會當減半，當然這是高難度，因為真濟專業機構建議，台灣的金控siuN che7間，in建議上好剩4間、5間抑是6間，m7-koh咱認為上好減半做7家，m7-koh絕對be7使財團化，嘛 tioh8依照市場機制，大家會當有無仝意見，會當檢討、腳步嘛會當放慢，m7-koh chit-e5方向絕對是正確的。
因為不管是新加坡、馬來西亞、或者是韓國，佇亞洲金融風暴了後，in針對銀行、金控的整併，攏有真好的成績kap表現，咱台灣欲 kap國際競爭，當然要思考銀行的減併kap金控合併，m7-koh咱絕無涉入所謂四大金控合併的代誌，ai3按怎合併，咱行政部門相關部會有in 的斟酌kap考量，咱只有支持。
中間猶koh講著 OTC案，我就看m7識 [bat]，可能是ETC，寫m7著矣！其實講著ETC，我嘛感覺莫名其妙，我根本就m7知啥物是ETC，我定定ka7 ETC kap計軸器lam7[濫]作伙，ka7 chit-e5弊案kap hit-e5弊案sa be7清楚，嘛m7知ETC kap計軸器有啥物無仝，我猶認為兩件是仝款的，所以欲 ka7 ETC牽涉著阿扁仔厝裡的任何人身上，che 嘛m7是事實。
台灣高鐵案是國家的重大建設，佇阿扁2000年執政前，in就已經動工，佇我任內繼續興建，台灣高鐵當時有當時的問題，我也m7免講傷濟，先天不良，m7-koh 佇後來，咱按怎協助伊，來完成全國上大的 BOT案，這 m7-na7是交通建設，嘛是會當 hou7台灣成做一日生活圈，特別是「西部走廊」。所以對政府來講，咱只准成功，不准失敗，因此咱關心，不管是興建安全抑是財政，這是天經地義的代誌，任何院長攏著鬥相共。
不只是高鐵，6月16日tu2通車的「北宜高速公路」，我嘛是千拜託、萬拜託，猶拜託當時的游院長講，chit-ma2宜蘭人做院長，這條路koh be7使通車，按呢就be7使怪別人囉。大家想看覓，有真che7問題敢講m7免私底下溝通？包括kap廠商的問題，你欲人趕工，敢毋免補--人？所以有真che7問題就是按呢關心才會當通車。為著安全，本來舊年年底、今年年初通車，延半冬，當時阿扁為著北宜高速公路列為六大建設，因為郝柏村院長無願意做，我teh擔任立委時theh8預算書ka7郝院長khian，對郝院長真歹勢，但是就是hit時的衝動也好、抗議也好，m7才會當恢復北宜高速公路的興建，才會當佇 6月16日正式通車，我嘛感覺真歡喜。
基隆河的整治、中科也好、中正國際機場也好、高雄水質的改善也好，阿扁攏非常盡心盡力，雖然我是總統，但是我對行政部門、相關部會的要求真嚴格，chiah-e5是阿扁的政見、阿扁的承諾、也是國家的重大建設絕對be7使講sng2笑，一定愛貫徹，一定愛完成。甚至大家知影的土地增值稅欲2年減半，經發會無過，he是多數意見，m7是共識決，但是，阿扁知影土地增值稅2年減半非常重要，對房地產的振興有幫助，對銀行體質改善koh-khah有幫助，就按呢硬sak[推]，真濟人批評按呢是圖利財團、地主等等。
今仔日看起來，這件代誌我猶是感覺真欣慰，咱做著矣！有人批評台肥人事，其實台肥人事kap南港軟體工業園區是兩回事，台肥人事欲按怎處理，董事長講總經理，總經理講董事長，大家講來講去，到尾，攏總換掉，這嘛是行政部門的決定，咱也tioh8尊重。
今仔日的重點是南港軟體工業園區第一期、第二期真成功，嘛是咱的驕傲，所以需要koh再進一步有第三期、第四期，in 嘛 kah[合]意台肥的土地，欲按怎取得，會當講，講會落大家儘量來合作，所以阿扁仔的關心ma7只有按呢爾爾，如果講be7落就soah去，敢講阿扁仔做總統，be7成的代誌會當 ka7伊變kah會成？
所以ka7 chit-e5 kap人事案牽拖作伙，實在是ka7伊無限上綱，做無必要的聯想，嘛m7免按呢。Koh 講tioh8證實第一夫人對二年前收取非法獻金的指控公然講白賊，我m7是欲幫太太講話，事實就是事實，我的太太並無講白賊，昨昏[hng]我koh ka7問一擺，事實就是按呢，無論是公的場合抑是私的場合，阮太太從來無kap陳由豪董事長見面，其實陳由豪是我台南縣的同鄉，我做律師的時chun7 [陣] 嘛擔任過in公司的顧問，嘛辦過東雲公司的案件，kap伊不只仔熟，所以我選市長，伊來贊助，我嘛真感謝，我從來無否認theh8過伊選舉的錢，包括總統大選，伊hou7國民黨一億，hou7民進黨一千萬，咱嘛真感謝，嘛開收據，所以有就是有。
Kap伊根本無見過面，結果會當tui3 2003年、2004年講到今年2006年，猶 teh hoe[花]講我的太太有kap伊見面，實在真無意義。我的太太也曾承認過，陳由豪當時已經被通緝佇海外，沈富雄立委的太太chhoa7陳由豪的太太到官邸欲見我的太太，阮某嘛是hou7伊入來，已經是一個通緝犯的太太，嘛無 ka7拒絕，有就是有，無就是無，用按呢來作罷免的理由之一，講夫人二年前對收取非法獻金公然講白賊，按呢敢著？按呢敢好？
有關罷免第四點理由：用人失當
第4條理由，講我用人失當，兩位副秘書長攏身陷弊案，內閣中如杜正勝、龔照勝、林陵三、呂桔誠、張景森、侯勝茂等攏 hong5看做國王人馬的閣員，攏是弊案纏身、爭議不斷。我欲ka7大家報告，任何一個團隊，只要有人出問題、有爭議，攏認為是弊案纏身，每一個人，你會使合意，嘛會使無kah意，無kah意的人你就講是用人失當？陳哲男前副秘書長涉案收押偵辦中，咱就無ke[加]講，辦到底絕對be7寬貸。
馬永成前副秘書長兩擺到檢調單位，不過是證人，就講伊涉嫌犯罪而遭受tioh8檢調約談，這嘛kap實際有所出入。
杜正勝大家嘛知影，伊是中央研究院院士，過去kap李登輝前總統非常好，伊是誰的人馬，大家嘛知影，伊的台灣主體意識非常強烈，chit種的話題，你會使討論教育部長有適任無？但是be7使講有爭議，就講阿扁仔用人無妥當，但是伊絕對毋是阿扁仔的人馬。
龔照勝過去是外商，我嘛無熟識，伊去任職其他職缺，嘛毋是阿扁仔的意思，嘛是人推薦後，講外商人才欲來投入政府行列，咱嘛 tioh8表示歡迎kap重視，包括金管會主委嘛是院長的意思，阿扁ka7 in尊重並且幫忙說服，不過按呢爾爾。有問題接受調查，咱嘛無護短，嘛無任何包庇。
林陵三是因為過去台北市捷運局chhoe7無局長，無人欲做，經過紹介，我嘛無熟識， chhoe7無人才，結果chhoe7伊來做捷運局長，按呢一年一條，五年五條捷運，也是佇伊任內推動成功，chit種的人來做交通部次、部長，敢會失人的禮？6月16日北宜高正式通車，林陵三敢攏無功勞？咱be7使hiah-nih8現實，伊敢有啥物案件被列為被告，抑是被偵辦？
呂桔誠過去我嘛無熟識，是我擔任總統後，伊佇國營會做副執行長、佇交通部所屬中華電信做副總經理時表現be7 bai2,才注意tioh8 chit-e5人，後來伊擔任台銀董事長、今仔日擔任財政部長，敢會當講伊是國王人馬？ka7所有我任內用的人攏講做是總統人馬，按呢，是按怎其他人m7是咧？
張景森的計智（點子）一大堆，擔任台北市都發局長時，若無伊提出容積轉移的主意，今仔日不可能有信義計劃區的開發；台北101大樓如果m7是伊的配合，我相信今仔日嘛無世界第一摩天大樓佇咱台北市，而伊對台北市都發局到經建會，hou7人講東講西，但是我欲請問有叨一件有代誌，包括當時我佇台北市政府，監察院佇我欲競選連任時，chia也查，hia也查，chia也調查，hia也調查，有啥物人被調查，包括張景森。但是我嘛是無著吊。
侯勝茂嘛hong5講是國王人馬，袂使講伊是趙建銘台大醫學院的老師，按呢就是國王人馬，其實伊欲擔任署長嘛m7是我的意思，是當時院長的推薦，當然侯勝茂我嘛熟識，所以支持，事實是按呢，伊koh有啥物案件？有啥物爭議？
我舉出chiah-e5 ka7國家的人才當做是個人人馬的例，按呢，官員是欲按怎做代誌？hou7人分類，猶hong5分派系，這攏是官場足無好的文化，希望大家指教。
一個團隊中難免會有一寡人出代誌，該按怎就按怎，咱嘛絕對be7講國民黨時期劉松藩院長掏空銀行，現在teh走路，所以就叫上tioh8-ai3負責、ai3落台。過去國民黨地方議會議長鄭太吉殺人，一直判而未決，到底phah死人是phah幾槍，teh查是加一槍抑是減一槍，一直無法度判死刑確定，誰欲負責？伍澤元因為八里污水廠弊案，法院判決欲追繳16億以上，一個案件就欲hong5追繳贓款超過16億以上，現在人佇叨位？伊的小弟猶teh做馬主的副秘書長，咱敢有去講過啥？
舊年縣市長選舉時，大家講國民黨提名e5候選人有一半以上有案底，包括最近台北市政府工務局官員集體貪污，有20外人被起訴；佇地下室保險箱私藏烏銃；市政府陽台有人死去，半年以上無被發現，kui-e5管理hiah-nih8 che7死角，咱敢有講什麼？所以我感覺，用人失當咱必須ai3檢討、也必須ai3接受公評，但是用按呢講法，就欲 ka7總統罷免掉，敢有充分的道理？
有關罷免第五點理由：外交挫敗
第五、外交挫敗，講阿扁仔佇公投議題上耍弄美國的信任；佇終統議題上以文字操作hou7美國對台灣失去耐心；佇過境議題上，以賭氣來耍弄美國，阿扁執政六年將台美累積40多年的友好關係破壞殆盡，事實敢真正是按呢？
大家攏知影，公民投票是基本人權、普世價值，台灣人民無法度公投，這是咱家己漏氣、誠無面子、無民主，按怎別人幾百年的經驗，全世界攏teh公投，按怎台灣的公投變成洪水猛獸、災難、戰爭？阿扁替台灣人民爭取公投權利有啥物毋著？當然我嘛面對真濟壓力，但是真清楚的，最後敢有啥物代誌？咱佇 2004年3月20日公民投票，最後敢有啥物代誌？美國布希總統舊年11月佇京都講，「台灣的民主是一個成功的故事、是中國學習的榜樣」，咱敢有啥物無面子？講我推行公投，按呢變成罷免我的理由。
終統大家攏知影，這是kap美國chhiau5好的代誌，外交部黃部長前後己經講30幾擺矣，咱要廢統，in講mai3用「廢除」chit種的字眼， in建議用「凍結」抑是「中止」，後來咱建議用「終止」，終了的終。英文ai3按怎用？咱嘛 ka7美國講，這是大家的共識kap諒解，咱哪有用文字操作hou7美國對台灣失去耐心？此擺薄瑞光理事主席來台，大家嘛佇媒體上看kah真清楚，終統的代誌已經結束，伊嘛真滿意阿扁總統對終統的處理，咱將台灣的未來、兩岸的關係最後決定權交hou7人民，毋是任何政黨、任何國家會當替台灣人民決定，必須要尊重2300萬台灣人民自由意願的選擇kap決定，這就是民主，是民主的鞏固kap深化，按呢敢有啥物m7著？
過境，這是為台灣國家的尊嚴，這m7是teh「食飽換iau」，坐飛機teh sng2，去巴拉圭tioh8坐30幾點鐘，按呢敢有快活？但是台灣國家的尊嚴、身為總統咱必須有所堅持，總be7使 kap 12年前李登輝前總統過境夏威夷時穿拖鞋、睡衫來抗議。如果我去阿拉斯加佇飛機頂穿拖鞋、睡衫來抗議，按呢敢有一個款？美國固然無面子，按呢咱猶有什麼面子？所以我會使mai3過境美國，照常會使出去訪問，為外交chhoe7出路、chhoe7活路。會當過境利比亞、印尼訪問，這攏是咱所期待、所歡喜的事，按呢的外交有啥物挫敗？過去6年，如果無美國支持，咱beh-na2(如何）會當佇 2003年1月1日成做世界貿易組織第144個會員國。
2001年9月，hit陣台灣做大水，對台灣頭淹到台灣尾，阿扁仔勘災用去1禮拜的時間，日時勘災，暗時穿雨鞋到總統府頭前，雨鞋thng3掉後，thng3赤腳照常進總統府辦公，kap華府、日內瓦聯絡，為著啥物？為著台灣欲參加「世界貿易組織」（WTO)，美國ka7咱鬥相共，欲按怎突破中國的封鎖kap杯葛，我是用chit種的心情「日時勘災，暗時拚外交、拚國際空間」，哪有啥物歇睏？這是美國鬥相共的結果。
以「世界衛生組織」（WHO)、「世界衛生大會」（WHA)來講，阿扁佇 2004年連任了後，也就是公投了後，公投是3月的代誌，5月世界衛生大會開會，美國ma7是第一擺投下贊成票，所以公投有什麼影響？美國仝款支持台灣參加「世界衛生大會」成做觀察員。咱為著欲參加「世界衛生組織」已經奮鬥十年矣，前八年thang講非常辛苦，m7-koh後來thang講漸入佳境，m7-na7美國、日本為咱投下贊成票，另外，有關「世界衛生組織」任何技術性的國際會議，過去咱攏無法度參加，chit-ma2已經會當參加至少14個以上，其他猶 teh爭取中。包括chit次「世界衛生大會」嘛進一步hou7咱會當有意義的參與，這攏是非常好的代誌，雖然be7使正式成做觀察員，m7-koh作為一個觀察員會當擁有的有意義參與，咱嘛會當慢慢享受tioh8,這當中美國對咱的支持影響非常大。
「終統」也好、「過境」也好，大家講kah誠歹聽，m7-koh敢有影響著 chit擺美國指派副貿易代表巴提亞來台灣，這是六年來美國官員來台層次上高的，為著欲深化、強化台美兩國經貿關係，為著推動自由貿易協定（FTA)，希望建立台美緊密經濟夥伴關係。這嘛是非常有意義、非常有價值的代誌。
台灣外交處境困難，m7是對阿扁仔開始，所謂外交挫敗，1971年咱退出聯合國he敢m7是挫敗？1978年台美斷交he敢m7是外交挫敗？結果咱tioh8莊敬自強、處變不驚，有誰講因為外交挫敗所以總統ai3下台？誰敢敢講？
中國對台灣外交的打壓是無分色彩的，所以大家知影，過去我做市長時，猶舉辦「國際地方政府聯合會」(IULA) 的「世界首都論壇會議」（WCF），當時包括美國華府的首都市長嘛來參加，時間是佇民國87年5月，阿扁猶有能力辦chit-e5會議，m7-koh當阿扁辦完「世界首都論壇會議」了後，中國知影了後開始抗議，講台北市哪有資格辦世界首都會議，台北m7是首都，只不過是中國一個普通的城市，首都是北京，所以ka7台北市趕出來。
馬市長又koh按怎？台北市猶是hong5趕出「世界首都論壇會議」，中國對台灣的打壓是無分色彩的，無因為馬市長，台北市就無受tioh8中國的打壓。今年4月佇台北市所舉行的「亞洲主要城市網會議」嘛是仝款，因為台北市欲辦，結果中國北京抗議，講一個國家kan-na會當有一個城市舉辦，be7使有兩個城市，台北市欲辦、北京就m7辦，所以舊年開天窗。有因為馬英九做市長，中國或者是北京敢就有對台北市有所禮遇？無。
講著亞太經濟合作會議（APEC)非正式領袖高峰會，阿扁仔希望王金平院長會當代表台灣擔任總統的特使，伊本人嘛真歡喜有chit-e5機會，m7-koh就算是王金平院長受tioh8朝野chiah-nih8大的愛戴kap擁護，be7使去就是be7使去。為啥物？因為chiah-e5牽涉tioh8有國家主權象徵的，包括國際會議，in的打壓、對台灣的打壓是無分色彩、無分藍綠的。所以，咱的外交處境是chiah-nih8困難，咱愛koh-khah團結才著，結果ka7 chit種中國的打壓，講做是咱外交的挫敗，欲來罷免總統，按呢敢有公平？
有關罷免第六點理由：兩岸關係緊張
第六條理由講，兩岸關係緊張。我欲請問大家，koh-khah按怎緊張，敢有過去hiah-nih8緊張？阿扁做總統六年，台海敢有發生啥物砲戰？敢有飛彈落到門口？蔣介石前總統的時陣猶有金門砲戰，李登輝前總統時猶有飛彈危機，phah到門口55公里外。阿扁的時代六年，koh-khah按怎緊張嘛無chit種代誌發生，m7是我真gau5，是大家共同的努力，維持台海的和平kap穩定。
如果講緊張，怎會有小三通到今仔日的擴大小三通？怎會有春節包機直航到今仔日進一步的四大包機專案？如果講今仔日阿扁當總統是以意識形態處理兩岸關係，造成兩岸關係停頓，咱兩岸的人員往來、兩岸的經貿、對中國大陸的經貿投資，攏是歷史性的新高，這敢是叫做停頓？
事實上，已經傷過頭熱矣、過度傾斜矣！結果用按呢講兩岸關係緊張，欲罷免總統？講我用意識形態處理兩岸關係，其實我有四個原則，當時宋主席舊年欲去中國的時陣，我嘛ka7這四個原則ka7伊講，伊嘛贊成，就是「主權」、「民主」、「和平」kap「對等」，這是我的意識形態，嘛是宋主席贊成的四大原則，按呢有啥物m7著？咱堅持這四大原則，be7使hong5矮化、be7使hong5邊緣化、be7使hong5地方化、be7使hong5去政府化、去主權化，這是作為一個台灣總統應該堅持的原則，有啥物m7著？
講我「終統」悖離對「四不一沒有」的承諾，6月8日我佇美國理事主席薄瑞光面前就講過，我2000年所講的「四不」，只要中共無意對台動武，我的「四不」無改變，我猶原重申強調我的「四不」，美國嘛表示歡迎矣！就是按呢矣！哪有什麼問題？按呢要罷免我，講兩岸經貿政策退化到「積極管理，有效開放」，無，敢欲大膽西進？按呢咱攏 mai3管理，hong5 hou7 伊過去，hong5 hou7伊去，我敢會當按呢想？做總統、做政府，敢會當按呢做？我有責任的。美國國會的調查報告講，全部去中國的投資有5600億美金，其中一半2800億是對台灣來中國投資的，如果真正有投資chiah-nih8 che7，是真嚴重的代誌。
有一工我看陸委會的資料講chit-ma2 1500億，佔全世界的三成，對台灣來中國投資，chit-e5比例真高。咱佇接單、海外生產有40％，九成佇中國，chit種對中國的高度倚賴、傾斜，如果咱失去台灣經濟的主體性，咱變做in的附庸、成做in經濟的一部份，這是非常危險的代誌。講咱欲「積極管理，有效開放」，這m7是二分法，卻是強調chit種風險管理，商業風險、政治風險，特別in對台灣猶有敵意，目前猶部署有820枚的飛彈對準台灣，每一年猶以100枚到120枚飛彈繼續增加的時陣，咱敢會當無有所警覺，koh ka7中國當作一般正常的國家？
所以這是做為一個總統應該盡的義務，咱be7使鎖國，嘛be7使ka7台灣所有的經濟命脈kap資源全部鎖佇中國。阿扁chit種信念，絕對be7改變，我嘛相信多數的台灣人民應該會當體會阿扁對兩岸課題的堅持。結果，有人soah講我「積極管理，有效開放」，hou7兩岸關係緊張，所以要罷免總統。
有關罷免第七點理由：挑撥族群對立
續落來第七條理由，講我挑撥族群對立，講阿扁仔khap8-be7-tioh8就「愛台、賣台、本省、外省」製造族群對立，來爭取個人、一黨政治私利，撕裂族群和諧。講一句無輸贏的，阿扁是所謂族群對立的受害者，我若m7是受害者，台北市長為啥物會連任失敗，我到taN 猶輸kah莫名奇妙，是輸佇叨位？是我市長做了無好，猶是有其他因素？
越頭想看覓這也莫怪，國民黨的領導者，當時就對催討不公不義的黨產表明，講lin2催討黨產就是teh挑撥族群對立。催討黨產kap族群對立有啥物關係？但是有的人講，這就是族群對立，你mai3 koh再討，koh再討就是挑撥族群對立。
阿扁做台北市長chin3前，我有一條選舉歌，「台北新故鄉，先來慢到攏相仝，新一代的台北人。對台灣來講，台灣新故鄉，先來慢到攏相仝，新一代的台灣人」。七月初一，阿扁欲轉來去故鄉祭祖，阮姓陳的開基元祖，三百年前對中國詔安來到台灣，最近我嘛聽著村裡的人去詔安做尋根之旅，結果我發現過去報紙、媒體電視所報導的，講阮的祖先佇hia，故鄉佇hia，soah講了m7著，認m7著祖先，認m7著祖先來的所在。雖然咱「不忘本」，愛知影對hia來，但是，猶是會有真che7的誤會，真che7報導的錯誤。
今仔日佇台灣，絕對無「省籍」的問題，只有「國家認同」的問題，我相信今仔日有爭議的，有歧見的是，台灣主體意識kap大中國主義的無仝。今仔日有人欲聯共制台，有人欲反共保台，但是你be7使講hia-e5堅持台灣主體意識、堅持反共保台的人，kap主張大中國主義、主張聯共制台的人無仝，你無認同，你就講另外一旁m7著、阿扁仔m7著，所以欲罷免，如果按呢就會當當作罷免的理由，按呢罷免be7了啦！反共保台以及台灣主體意識的 chiah-e5信仰者、主張者、堅持者，敢講攏tioh8被罷免，攏tioh8被趕出去？
台灣真小，咱應該tioh8團結、ai3和諧，咱應該tioh8認同chit-e5所在，mai3 koh分彼此，咱會當尊重無仝的意見、尊重無仝的主張，但是be7使用chit種方式，來對待無仝意見的人。
有關罷免第八點理由：操弄金融改革
第八條罷免的理由，講是操弄金融改革，講政府以金改之名行圖利財團之實，講台新金theh8著彰銀經營權、台企銀民營化、中華開發收購金鼎證券案、元京集團kap復華金控合併案，攏有第一家庭成員介入的嫌疑。無就是無，你去問彰銀的董事長張柏欣，第一家庭啥物人去介入台新金kap彰銀的代誌，攏會當去探聽。
銀行beh民營化，這是政府的政策，kap第一家庭有啥物關係？銀行無民營化，欲按怎會有競爭力。大家攏講國營企業ai3企業化、民營化，像中船、唐仔榮的再生，因為按呢今仔日才會當生存落來。我會記得2000、2001年，中船就虧損76億，唐仔榮鋼鐵廠嘛虧損80億，經過民營化、再生後，中船舊年than3[趁] 9億，唐仔榮than3 11億，會當轉虧為盈，本來是一個負擔，現在變成資產、變成驕傲，咱嘛感覺真歡喜。
中華開發kap金鼎證券、元京證券，我根本就m7知是誰，有啥物關係，講啥物有介入？仝款的，講著復華金，咱嘛知影he是國民黨的黨營事業，咱欲按怎去介入？chit種繪聲繪影的事，敢chiah-nih8好牽拖？大家攏知影金融改革，2000年阿扁做總統，下半年世界性的經濟開始變bai2，網路科技泡沫化，台灣首當其衝，我嘛相當煩惱，大家攏講佇2000年底、2001年初，台灣有可能發生本土性的金融風暴，我煩惱kah睏be7去，佳哉大家共同來努力渡過難關，koh ti7 2001年訂為金融改革e5元年，今年臨時會通過6大金改法案。包括RTC、AMC e5訂定嘛順利通過，iau2有經發會，欲按怎通過chiah-e5難關咧？
以前講，打消 phann3-siau3(呆帳）超過6000多億，敢講he是阿扁時代所累積的？變成phann3-siau3 koh 會當 打消，無經過3、5年，敢是可能的代誌？ 攏是teh擦尻穿。大家過去嘛 bat聽過，kan-na是一個王玉雲的中興銀行、劉松藩的台中商業銀行、陳冠倫的投資公司以及梁伯薰的商業銀行、郭廷才攏東港信用合作社，因為掏空金融，kan-na chit五個就有偌che7？641億新台幣，你講，che 敢講是阿扁仔的時代所造成的？攏是替別人teh擦尻穿。所以後來咱才推動258，後來咱成功矣，所以才推動二次金改，政府用心改革，soah ka7伊污名化，ka7伊醜化到講「無案不弊，每案必弊」，我感覺非常無公平，對咱所有的工作伴非常的無公平。
有關罷免第九點理由：戕害新聞自由、媒體自由
第九條，欲 ka7我罷免的理由講我戕害新聞自由、媒體自由，講我全力箝制媒體，打壓新聞自由，講我打壓TVBS，講我阻撓NCC。我若是戕害媒體自由，我今仔日敢會chiah-nih8悽慘落魄？敢會hou7人叮得chiah-nih8慘？
逐年5月3日是新聞自由日，美國的自由之家，攏會提出世界新聞自由度的評比，咱台灣，2年前佇全世界190 goa7個國家內底排名第49名，咱嘛是新聞自由國家，舊年進步5名，是第44名，今年咱進步9名，是35名。佇全世界190 goa7個國家，有新聞自由的國家，也有半新聞自由的國家，也有完全無新聞自由的國家，咱是排佇百分之百新聞自由的國家的行列，咱是kap歐美的國家仝款，今年咱進步9名，是35名，台灣kap日本仝款，並列亞洲e5第一名。
阿扁若戕害媒體自由，咱敢會當kap日本仝款，新聞自由是亞洲的第1名？中國第幾名？177名。對後尾算來khah快，完全無新聞自由。所以咱猶m7知愛珍惜，猶teh講我打壓新聞自由。
今仔日就有人笑我，講阿扁你今仔日知影矣hoNh！你毋著矣honnh！當初時叫你ka7 TVBS關起來，你就boaih，chit-ma2你自食惡果，我真正嘛無言以對，但是我的信念，我無怨無悔，當時我就是因為「蓬萊島案」，我辦雜誌去批評，所以咱愛爭取百分之百e5言論自由，後來我hong5抓去關，所以阿扁仔就是當時無新聞自由，我是一個被害者，我是一個過來人，我非常珍惜，對威權行向民主，得來無容易，真che7 的民主，真che7的自由，得來無容易，咱tioh8-ai3珍惜。我甘願過度民主、過度自由，嘛無願意無夠，所以當時有人講欲關掉，我講，我be7當按呢做，我嘛hou7人罵kah誠慘，in講，in就是按呢軟土深掘，按呢一直弄落去，欲hou7你死lah！
但是今仔日市場機制感覺講，做kah傷過份矣，無應該是按呢，自由閱聽者、讀者、聽眾、觀眾，大家會做一個監督、制衡kap處置，m7免阿扁仔來無閒、來傷腦筋，這就是我對新聞自由的尊重。但是尊重m7是無限上綱，這是大家應該共同勉勵的代誌。若無，阿扁仔會當用過去的國民黨政府戒嚴時期上chiap8用的一句話「破壞政府kap人民的感情」，按呢就ka7人關起來矣，咱敢會當按呢？為著國家的安全，就欲 ka7人關起來，ka7伊關掉。
大家知影，我若是按呢做，慢慢仔就會行入獨裁，獨裁就是按呢產生的。今仔日會當用chit-e5理由，就會當用hit-e5理由，我敢會當按呢做？我甘願家己受害，我嘛無願意揹戕害媒體的罪，可能我m7著矣，m7-koh我無怨、我無悔。
講我ka7 NCC阻擋，m7-koh NCC是阿扁掛牌的，籌備處是阿扁掛牌的，這是政府改造的一部份，最後是拖siuN久，無通過，但是假使有通過，佇過程中有牽涉是m7是有違憲的爭議，當然lah！che就ai3透過大法官來解釋，這是天經地義的代誌，beh-na2會當講咱阻撓咧？所以chit-ma2有人開始煩惱矣，NCC變成BCC，變成藍色的 CC，所以大家ai3非常嚴肅來面對chit-e5大家擔心的課題。欲用按呢 ka7我罷免，講我戕害媒體自由，敢有公道？
有關罷免第十點理由：施政毫無誠信
最後第十條，講我施政攏無誠信，講我無論是佇核四案、猶是兩岸政策，全部攏人格誠信破產。我欲請問，我敢有騙大家？
核四議題，民進黨的黨綱，規定kah真清楚，咱就是反核的政黨、欲主張廢核的政黨、行向非核家園的政黨，阿扁做台北市市長，核四廠beh 抑boaih？佇一個市民過半數的投票，贊成核四廠ai3關掉，多數人贊成核四廠ai3關掉，ai3停建，he 嘛是我teh做市長，公開所做的代誌，嘛是我的政見，所以最後重新評估感覺講，核四廠應該tioh8停建，所以做chit種的宣布，在野黨欲 ka7我罷免，我嘛認矣！
但是真清楚的，後來經過大法官的解釋，咱必須ai3尊重國會的決定，除非大家會當透過行政部門、立法部門協議，若無猶是ai3尊重國會的決定。若是國會決定欲續建，咱tioh8-ai3尊重國會的決定，尊重大法官的解釋，咱無誠信破產。
今仔日我的理念、我的信念，我猶是反核，我猶是主張廢核，要行向非核家園，我無改變過。
你講兩岸政策我有啥物改變？咱無法度接受所謂一個中國原則，無法度接受九二共識，chiah-e5攏是公開的代誌，我無騙大家，六年來我始終如一，未來的兩年我猶是be7改變，九二共識根本就無存在，一個中國就是欲將台灣變做中華人民共和國的一部份，變做第二個香港，咱當然無法度接受。就是按呢，因為我m7接受一個中國，因為我m7接受九二共識，就欲ka7我罷免，按呢敢有道理？
我be7使賣國求榮，我欲kap胡錦濤主席握手猶m7 khah簡單？我欲去北京猶m7 khah簡單？只要我接受一個中國原則，我就會使去矣！我就會使握手矣！但是he有啥物意義？che有啥物價值？我be7使做出hit種賣國求榮的代誌，這就是我的堅持。如果講因為按呢就欲ka7我罷免，我嘛認矣！
講啥物我操弄「正名制憲」、撕毀中華民國，soah koh突然主張大聲唱國歌，講我公開宣稱「台獨是自欺欺人，soah koh發動廢統」，講我著，又koh講我m7著。我啥物時陣bat講過「台獨是自欺欺人」？ mai3 ka7我的話斷章取義，ka7我無講過的代誌變成罷免的理由之一。當然，台灣是咱上好的名字、上有力的名字、上美麗的名字，chit點我根本就無改變，對有正式外交關係的國家，咱叫做中華民國（括弧台灣），現在聯合公報嘛攏是按呢寫的，若無，真正大家會sa be7清楚！
所以咱希望會當做一個思考，這敢有什麼m7著？咱需要一部合時、合軀[su]、合用的台灣新憲法，che中間如果大家有無仝的意見，攏總會當討論，但是這是一個目標、一個理想，這敢有啥物m7著？當然我嘛知影，欲改國號是偌nih8仔困難，但是有一寡人有chit種的主張，咱嘛tioh8 ka7伊尊重。猶無改chin3前，咱就是中華民國，中華民國的旗仔咱猶是欲 theh8出去，阿扁仔去到叨位，嘛攏是theh8中華民國的國旗，唱中華民國的國歌。
你講中華民國的國歌有一寡人m7唱，唱kah無夠大聲，甚至be7使唱出來，這是為著啥物？這是非常重要的嚴肅課題，為啥物別的國家無chit種問題？為啥物咱台灣，咱家己的國歌有chit種的問題？敢有才調去中國大陸唱？敢有本事ka7國旗theh8到中國大陸去？
所以大家mai3有雙重標準，阿扁的原意，是欲凝聚咱kui-e5國家的認同，鼓勵大家大聲唱咱的國歌，這m7是be7使改，但是佇無改chin3前，咱應該tioh8大聲唱出咱家己國家的國歌，按呢有啥物m7著？soah講我攏無誠信。
各位鄉親，各位父老兄姐，阿扁從政tu2好25年，我行入政治這條路tu2好四分之一世紀，這條路並無好行，人議員一任四年，我只有做三年一個月koh過三工，我就倒店矣。為著追求百分之百的言論自由，為著蓬萊島案，我被判刑，m7-na7被關，猶害阮太太佇我選台南縣縣長謝票的期間，遭受政治車禍，已經坐輪椅21年矣。作市長拚死拚活，拚kah第二年施政滿意度達到89％，拚到第4年落選嘛猶有76％，結果開票了後，我必須tioh8講出「對進步團隊的無情是偉大城市的象徵」chit句話。
2000年阿扁佇大家無嫌棄，用愛、用民主的選票來支持我，kap大家同齊來完成台灣歷史上第一擺政黨輪替，2000年5月20日上任後無kah半年，人就欲 ka7我罷免。
做一個里長嘛ai3經過一咚，做一個總統soah無kah半冬就欲ka7我罷免，理由是因為公共政策的意見無仝。咱欲停建核四，人欲續建核四，因為公共議題的意見無仝款，就欲提出罷免，我看嘛kan-na台灣才有pah！
2004年阿扁仔欲連任競爭，非常激烈，投票前一工3月19日hou7人暗殺，佳哉天佑台灣，大家有福氣，上天神明有保佑，hou7我逃過一劫，soah 猶有人講我是自導自演，講我是作假的，害這幾工連李昌鈺博士嘛受著牽連、hong5拖落水，講伊theh8錢了後teh作假，chit種的侮辱方式敢著？阿扁敢會theh8家己的生命講sng2笑？輸贏無che7，但是嘛m7免chhoe7理由，講是輸佇兩粒銃子面頂。
2004年3月20日開票以後，總統府頭前hit種的景像，大家koh再想看覓，講什麼阿扁仔總統作票，欲按怎作票？我be7曉，我嘛無作票的經驗。你講20萬選務人員，hiah-nih8 che7人敢是我用的？免講che7，20個、甚至2個就好，出來講是阿扁仔總統、是政府叫伊作票的，有無？根本連半個嘛無，按呢講阿扁仔作票，koh m7承認選舉的結果，1600多萬張選票ai3重新驗票，浪費二個月，雖然輸贏無che7，m7-koh阿扁仔猶原是得著選舉，in敢有向全國人民道歉？講總統作票、講政府作票，造成hiah-nih8大的風波，chiah-nih8 che7社會成本的付出，敢有人出來道歉？
當然要拍選舉官司，這是當事者的自由，兩件官司ma7 phah年外，最後官司攏總輸了了矣，soah koh指控司法不公，到今仔日欲來罷免我。m7是阿扁仔驚罷免，阿扁仔尊重立法委員有罷免的權利，阿扁仔的去留交hou7大家、交hou7立法院、交hou7 2300萬的台灣人民，阿扁仔上掛念的，是大家hou7我機會，抑我是m7是無hou7大家滿意，koh hou7大家失望，我koh-khah本土、koh-khah清廉、koh-khah改革，嘛做了無夠che7、無夠好，我必須ai3注意聽大家的批評指教，我也必須ai3隨時檢討家己、反省家己。真che7所在，可能我做m7著矣；真che7所在，我必需ai3 ka7大家會失禮；真che7所在，我也必需ai3接受各方面的指責kap調查，但是有一點我必需ai3 ka7大家講，因為大家hou7我機會，四分之一世紀以來，hou7我chiah-nih8 che7會使為大家服務的機會，我必需ai3珍惜得來無容易的一切。
我無以為報，但是我非常清楚，細漢的時陣，父母ka7我講，咱兜散赤， m7-koh，散赤m7是無面子的代誌，散！嘛ai3散去有志氣，所以我細漢的時陣去khioh蕃薯，m7-koh絕對be7使偷theh8蕃薯。我欲讀冊，阮老父借錢來hou7我讀，等到日後我若than3錢，一定ai3還，be7使欠人的錢，chiah-e5是細漢的時陣，阮老父母ka7我講的話。大漢了後，我擔任律師，定定hou7當事人倒siau3，開支票付律師費定定無兌現。阮太太ka7我講，案件了錢也tioh8辦，就算thap稅金嘛 tioh8幫chiah-e5可憐的人，in會倒律師費，一定是有困難，一定ai3好好仔替人做義務辯護。我從政的過程，阮太太一再提醒我，做議員、首長有一個原則，be7使theh8紅包、炒地皮，ai3做正的、清的，所以我做總統以後自動減薪，因為做總統不是欲來領hiah-nih8高的薪水的，錢有夠用就好，一個月80幾萬，我自動減做40幾萬，四年一任減少2000萬，二任八年減4000萬，錢是身外之物，無啥物好計較的。
我會記得hit時陣，ti7政權和平轉移的時，相關方面的人ka7我講，總統有私奇錢，有奉天專案30億以及當陽專案6億，私人嘛會當開，我聽m7識。後來咱知影che根本是be7使得的。過去會使，阿扁仔be7使。所以劉冠軍案發生代誌，大家嘛知影he是佇我就任前就發生的代誌，一空 [khang]hiah大空。知影tih-beh突破矣，有關單位猶ka7我騙，講無事，錢無賠，文件嘛無遺失，結果攏m7是按呢，路尾，我ka7奉天案30億，當陽案6億long2繳庫，咱是按呢做的。
查某囝大漢結婚了後，增加新的成員，咱嘛誠擔心，所以對趙建銘，阮太太一再ka7伊講，做醫生應該安分守己，兩種錢be7使theh8，第一是患者的紅包，第二是藥商的錢。親家有緣，大家會當有親家門風，咱嘛足珍惜的。但是，聽著chit種傳言時，咱嘛誠緊張，將親家叫來，一再ka7伊講，你mai3害我，chit-ma2時勢無仝矣，m7是國民黨時代，chit-ma2是民進黨執政，人是用ham3鏡來看咱，「鴨蛋khah密嘛有縫」， mai3造成對我的傷害，帶來我的困擾，伊講be7，結果咧？所以hit工我ka7阮太太講，囝婿咱無才調教，chit-ma2就hou7法律、司法來ka7教，hou7檢察官替咱來ka7教示，當然無啥物thang比阿扁仔對囝婿、親家牽涉chiah-e5案件，hou7阿扁仔痛心kap難過，感覺真慚愧，但是我猶是ai3負起這責任，我猶是願意接受任何指責，造成hiah-nih8 che7、hiah-nih8大的傷害，非常見笑，失禮。
總是最後，阿扁仔欲ka7大家報告，我知影誠che7人誠恨我，誠che7人對我誠be7爽，甚到有人感覺為啥物2004年3月19日hit銃無ka7我phah死，阿扁仔無hong5 phah倒，有一寡人誠m7情願，所以最近有人講，銃子已經入好矣（子彈已經上膛），只chhun猶未彈出去（扣扳機），欲hou7 阿扁仔死kah真歹看。
大家攏知影，兩年外前，阿扁仔無死，這條命是加出來的，為著台灣，我願意付出代價，為著台灣，我也願意揹十字架，為著台灣，我願意犧牲。如果真che7人對我的怨、對我的恨一定ai3扣扳機，hou7阿扁死kah 真歹看，按呢才會當平復、才會當紓解，按呢我願意，我願意為台灣來犧牲，就請扣扳機pah！
但是我知影，大家猶是崇尚和平的，大家猶是愛護自由的，猶是追求民主法治的，咱愛台灣chit塊土地，咱希望台灣會當 koh-khah好，我希望大家會當 koh-khah團結。以暴制暴，訴諸暴力絕對be7當解決問題，續落來我知影會ju2來ju2激烈，各種的抗爭難免會有衝突，我猶是欲再次呼籲大家必須ai3冷靜，國有國法，咱有憲法秩序，嘛有法律規定，咱希望大家會當理性來面對，我相信台灣人民絕對有夠額的智慧kap能力來面對chit種的困局，來共渡難關。
個人無重要，阿扁一個人嘛無重要，阿扁上掛念的是台灣2300萬人民be7使hong5欺負，咱台灣chit-e5偉大的國度be7使成做人的地方政府，be7使成做人的特別行政區，台灣的主體意識的路線，台灣的民主制度、自由制度、人權制度、和平制度，絕對是一條正確的路，咱必需ai3堅持勇敢行落去。咱ai3相信台灣，咱ai3相信人民，咱ai3相信民主，koh-khah ai3相信法治。
「蕃薯m7驚落土爛，只求枝葉代代湠」，阿扁仔願意kap大家互相勉勵，為著台灣的主體性，為著民主的深化，為著兩岸的和平，為著經濟的繁榮，以及為著社會的公義，咱必需要koh-khah團結。阿扁仔永遠追隨大家，追隨上偉大的 2300萬人民，請大家會當繼續不吝提攜指教，阿扁敢有資格koh再繼續做咱的總統，就交hou7大家啦！就交hou7 2300萬的台灣人民，大家來共同決定。足歹勢！耽擱大家足che7的時間，嘛影響大家足che7的作息，再次ka7各位致上最高的敬意kap感謝，多謝，晚安！
| http://www.southnews.com.tw | 2006.06.20 |
|