／多田惠

　四月初三，TVBS游皓婷記者報導《報案「黑白講」　免驚！來電顯示地址》，指稱台北縣警局勤務中心安裝一套來電顯示地址ê系統，講：「很多路名用台語唸起來很類似，像是三重長安街、重安街、長元街，用聽的，根本分不出來」。這m是事實。

　長元街讀 Tiông-gôan-ke，長安街讀作 Tiông-an-ke。發音無仝。一定聽會出來。只有「長安」kap「重安」chiah是「用聽的，根本分不出來」ê例。其實，kan-na問「是長短ê長？抑是重複ê重？」或者照三重埔ê地理問「是城隍廟附近ê長安街？抑是忠孝大橋附近ê重安街？」就會當解決。

　舊年九月十二，TVBS施協源記者有一篇題目做《「石頭的石」翻版　老婦求救急煞人》ê「獨家」報導，講：「有一位老阿嬤打119求救，用台語說他住長元街。到底是長元街、長安街還是同安街、重安街，消防員找老半天，才救到人」。九月十六，自由廣場刊出邱進興先生對這篇報導ê批評指出：「長元、重安及同安是不可能會說不清或混淆的，請媒體記者要自制，不要不懂裝懂，還趁機羞辱閩南語一番」。

　這屆ê報導講「很多路名用台語唸起來很類似」。TVBS這半冬一直引用「長安街」，koh加入一寡不實成份像「長元街」。互人懷疑：這款路名敢真正「很多」？另外，咱ma愛會記得：現此時台灣ê路名真濟是中國人號ê，根本無teh用台語ê思考。所以，若有這款ê問題，這m是台語本身ê問題，是中華民國殖民體制所造成ê無公平。「長安街」若無方便，改作「西安街」抑是koh khah本土ê路名就好。

　Koh khah大ê問題是TVBS舊年ê不實報導已經受著社會ê批評，TVBSê記者koh繼續散佈白賊新聞，繼續侮辱台語。實在傷過惡質。互咱koh一擺知影中資媒體對台語ê無了解kap歧視。

　【註】
　kap：跟
　chiah：才
　kan-na：只
　koh：又
　koh khah：更


（多田惠／日本目白大學推廣中心日藉台語講師）